Նորություններ

-
Սանտի Դենիա. «Հայաստան անունը ֆուտբոլային աշխարհում օրեցօր ավելի շատ է հնչում»
13.05.201916:00
Սանտի Դենիա. «Հայաստան անունը ֆուտբոլային աշխարհում օրեցօր ավելի շատ է հնչում»

ՀՖՖ պաշտոնական կայքը սկսում է Մ-19 Եվրո-2019-ի մասնակից հավաքականների գլխավոր մարզիչների հետ հարցազրույցների շարքը: Երևանյան առաջնությանը ամենատիտղոսակիր հավաքականին՝ Իսպանիայի Մ-19 ընտրանուն նախապատրաստող Սանտի Դենիան պատանիներին մարզելու հարուստ փորձունի։ Մարզել է նաև Մ-17 հավաքականը։ Որպես ֆուտբոլիստ հայրենիքում նվաճել է չեմպիոնի կոչումն ու գավաթը։ Նրա ֆուտբոլային կրթությունն անմիջական կապ ունի ՀՖՖ տեխնիկական տնօրեն Խինես Մելենդեսի անվան հետ։

-Իսպանիայի հավաքականը միևնույն ընտրական խմբում ընդգրկվել էր Հոլանդիայի ընտրանու հետ, որը նույնպես բավական ուժեղ է։ Ո՞րն էր եզրափակիչ դուրս գալու գրավականը։

-Մի քանի տարի Իսպանիան, ցավոք, չի հաղթահարել որակավորման փուլի արգելքը, բայց միշտ ձգտել է լավ արդյունքներ ունենալ ։ Այսպիսով, չեմ կարծում, թե շատ ենք տարբերվում մյուս թիմերից։ Մեր ֆուտբոլիստներն օժտված են նաև մարդկային լավ հատկանիշներով։ Գիտենք՝ բոլոր թիմերն էլ լավ են խաղում և ցանկանում են նվաճել չեմպիոնի կոչումը։ Պետք է թիմը մրցունակ դարձնենք, որ մշտապես ձգտի մնալ ամենաբարձր մակարդակում։ Այդ նպատակով խրախուսում ենք ոչ միայն սպորտային, այլև մարդկային հատկանիշները։ 

-Իսպանիայի՝ տարիքային խմբերի հավաքականները պարբերաբար ֆավորիտ են համարվել։ Իսպանիայի ընտրանիներն ընդհանուր խաղաոճ ունեն։ Լրացուցիչ ինչպիսի՞ առանձնահատկություն ունի Ձեր գլխավորած հավաքականը։   

-Ճիշտ է՝ երկար տարիներ հաստատուն խաղաոճ ունենք։ Ոճային խաղը սահմանում ու ներդնում ենք տարիքային տարբեր խմբերում։ Ուժեղ ենք գնդակ ստանալիս ճիշտ «բացվելու» ժամանակ, փորձում ենք նախաձեռնող ֆուտբոլ խաղալ և միավորել խաղի բոլոր բաղադրիչները։ Չեմպիոնի կոչմանը միտվել կարելի է միայն լավ պաշտպանվելու, հարձակվելու և լավ ու արագ անցումների դեպքում, ստանդարտ դիրքերի լավ ու բազմազան խաղարկումների պարագայում։ Այս ամենը մեզ հաջողվում է, որովհետև մեծ նշանակություն ենք տալիս մարդկային գործոնին, թիմով ընտանիք դառնալուն։      

-Ո՞ր թիմերին եք ֆավորիտ համարում երևանյան առաջնությունում։

-Հատկապես Մ-19 տարիքային խմբի մրցաշարում, որին 8 թիմ է մասնակցում, բոլորն էլ հաղթելու հնարավորություն ունեն։ Ուզում եմ ընդգծել՝ խաղերի ելքը վճռվելու է դետալների միջոցով։

-Խինես Մելենդեսը ստանձնել է Հայաստանի ֆուտբոլի ֆեդերացիայի տեխնիկական տնօրենի պաշտոնը։ Ի՞նչ կպատմեք համատեղ հուշերից։ Եթե Հայաստանն ու Իսպանիան միևնույն խմբում հայտնվեն, այս հանգամանքը կարո՞ղ է օգնել Հայաստանի ընտրանուն։

-Ինձ համար հաճելի է խոսել Խինեսի մասին, որի դերն իմ կյանքում շատ կարևոր է։ Նրան ճանաչում եմ այն ժամանակից, երբ «Ալբասետեում» իմ ուսուցիչն էր։ Հետո գնացի խաղալու «Ալբասետեի» ակադեմիայում, որտեղ մարզիչը և կառուցվածքի համակարգողը Խինեսն էր։Նա ինձ սովորեցրեց ֆուտբոլ խաղալ, բայց նաև նրանից սերտեցի կյանքի արժեքները։ Հետո մեր ճանապարհները խաչվեցին Իսպանիայի ֆեդերացիայում։ Այստեղ 8 տարի միասին անցկացրինք, դա նոր հնարավորություն էր նրանից սովորելու համար։ Խինեսը կարող է օգնել Հայաստանի ընտրանուն Իսպանիայի դեմ հնարավոր խաղից առաջ։ Անկասկած, այն մարդկանցից է, որ մեզ լավագույն կերպով է ճանաչում։ Իսպանիայի՝ տարիքային խմբերի հավաքականների կրթության ակունքներում է Խինեսը. մեր մասին նրա իմացությունը շատ կարևոր է Հայաստան-Իսպանիա հնարավոր հանդիպման համար։

- Ի՞նչ կպատմեք Հայաստանի մասին։ Երևան այցելությունից ի՞նչ սպասելիքներ ունեք։

- Հայաստան անունը ֆուտբոլային աշխարհում օրեցօր ավելի շատ է հնչում։ Պատճառը ոչ միայն արտերկրի լիգաներում Հենրիխ Մխիթարյանի ու մյուսների հաջող խաղն է։ Հայկական ֆուտբոլը զարգանալու է նաև ֆուտբոլային կրթությանը պատշաճ ուշադրություն դարձնելու շնորհիվ։ Երկիրը, որտեղ ջանքեր են գործադրում պատանեկան ֆուտբոլի համար, արդյունք է ունենում։ Հայաստան այցելելու առիթ դեռ չեմ ունեցել, բայց հիմա սպասումով եմ լցված, ամռանը կհանդիպենք։

Բարձրագույն խումբ

N Թիմեր Խ Մ
1. Արարատ-Արմենիա 13 26
2. Արարատ 13 26
3. Շիրակ 13 25
4. Ալաշկերտ 13 23
5. Լոռի ՖԱ 13 22
6. Նոա 13 20
7. Փյունիկ 13 16
8. ՈՒրարտու 13 15
9. Գանձասար-Կապան 13 10
10. ՖԱ Երևան 13 0