Մեկնարկել է ՀՖՖ/ՈՒԵՖԱ Մարզչական Դ արտոնագրի դասընթացը
Արագածոտնի մարզի Թալին համայնքում «Ֆուտբոլը դպրոցներում» ծրագրի շրջանակում մեկնարկեց ՀՖՖ/ՈՒԵՖԱ Մարզչական Դ արտոնագրի դասընթացը:
2025 թվականին մեկնարկում է «Ֆուտբոլը դպրոցներում» կրթական ծրագրի նոր՝ քառամյա փուլը։ Ծրագրի առաջին մասով կանցկացվեն ՀՖՖ/ ՈՒԵՖԱ մարզչական Դ արտոնագրի դասընթացները, որին կմասնակցեն մարզային հանրակրթական դպրոցների ֆիզկուլտուրայի ուսուցիչները։ Մարզչական դասընթացները կանցկացվեն ապրիլ – հունիս ամիսներին Արագածոտնի (Թալին համայնք), Արմավիրի (Վաղարշապատ համայնք), Լոռու (Գուգարք, Սպիտակ և Վանաձոր համայնքներ), Շիրակի (Գյումրի և Ախուրյան համայնքներ) և Տավուշի (Բերդ և Նոյեմբերյան համայնքներ) մարզերում։
«Ֆուտբոլը դպրոցներում» կրթական ծրագրի նախորդ քառամյա փուլի ընթացքում ՀՖՖ կողմից կազմակերպվել են ֆիզկուլտուրայի ուսուցիչների վերապատրաստման՝ ՀՖՖ/ՈՒԵՖԱ մարզչական Դ արտոնագրի դասընթացներ ՀՀ բոլոր մարզերում և Երևանում: Դրանց մասնակցել են հանրակրթական 594 դպրոցների 760 ուսուցիչներ, իսկ ֆուտբոլի դպրոցական մրցումներին մասնակցել է 21600 աշակերտ հանրապետության ողջ տարածքից։
