Դասընթացի մասին

ՈՒԵՖԱ/ՀՖՖ Ց կարգի արտոնագրի դասընթացը մարզչական կրթության հիմնական ուղու հիմնարար մակարդակն է և նախատեսված է այն անձանց համար, որոնք ցանկանում են սկսել կամ զարգացնել իրենց մարզչական գործունեությունը։

Դասընթացը նախապատրաստում է մարզիչներին մասսայական ֆուտբոլում աշխատելու համար՝ առանձնահատուկ ուշադրություն դարձնելով երեխաների և պատանիների զարգացմանը։

Ուսուցման հիմքում խաղացողակենտրոն մոտեցումն է, անվտանգ և դրական ֆուտբոլային միջավայրի ստեղծումը, խաղի միջոցով ուսուցումը և տեսական գիտելիքների կիրառումը գործնական մարզչական աշխատանքում։

Դասընթացի նպատակը

Դասընթացի նպատակն է ձևավորել մարզչական աշխատանքի հիմնական սկզբունքների ամբողջական ընկալում և զարգացնել այն կարողությունները, որոնք անհրաժեշտ են խաղացողների տարիքին ու զարգացման մակարդակին համապատասխան մարզումներ պլանավորելու, կազմակերպելու և անցկացնելու, նրանց զարգացմանն աջակցելու և սեփական մարզչական աշխատանքը վերլուծելու համար։

Դասընթացը նաև խրախուսում է ինքնակրթությունը և շարունակական մասնագիտական զարգացումը՝ որպես մարզչի հետագա առաջընթացի կարևոր բաղադրիչներ։

Ուսուցման հիմնական ուղղությունները

Դասընթացի բովանդակությունը կառուցված է չորս փոխկապակցված ուղղությունների շուրջ՝ «Մարզիչը», «Միջավայրը», «Խաղացողը» և «Խաղը»։

Մարզիչը

Մարզչի դերն ու պատասխանատվությունը, մարզումային գործընթացի պլանավորում և կազմակերպում, հաղորդակցություն և հետադարձ կապ, սեփական աշխատանքի վերլուծություն, տեխնոլոգիաների կիրառում մարզչական աշխատանքում։

Միջավայրը

Երեխայի պաշտպանությունը ֆուտբոլում, անվտանգ և դրական մարզումային միջավայրի ձևավորում, սպորտային էթիկա, արդար խաղ, առաջին բուժօգնության հիմնական սկզբունքներ։

Խաղացողը

Տարիքային առանձնահատկություններ, ֆիզիոլոգիայի հիմունքներ, տեխնիկայի ուսուցում, հիմնական շարժողական հմտություններ, ֆիթնես թեստավորման և սննդաբանության հիմնական սկզբունքներ։

Խաղը

Խաղի հիմնական սկզբունքների ընկալում, խաղի միջոցով ուսուցում, տարբեր խաղային իրավիճակների և փոքր կազմերով խաղերի կիրառում, խաղի կանոններ։

Դասընթացի կառուցվածքը

Դասընթացը բաղկացած է վեց ուսումնական մոդուլից և ավարտական քննություններից։

Այս մոդուլներից մեկը նվիրված է ֆուտզալին և մասնակիցներին ծանոթացնում է ֆուտզալի հիմնական առանձնահատկություններին և ձևավորում նախնական գիտելիքային հիմք՝ ֆուտզալի մարզչական ուղղությամբ հետագա մասնագիտական զարգացման համար։

Ուսումնառությունը համադրում է տեսական մասը, դաշտում իրականացվող գործնական պարապմունքները, անհատական և խմբային աշխատանքը, ինչպես նաև միջմոդուլային գործնական մարզումները, որոնց ընթացքում մասնակիցները կիրառում են դասընթացում ձեռք բերած գիտելիքներն ու հմտությունները։

Գործնական առաջադրանքները կատարվում են մասնակիցների սեփական թիմերի հետ կամ ՀՖՖ-ի կողմից տրամադրվող թիմերի ներգրավմամբ։

Դասընթացի բոլոր ուսումնական բաղադրիչներին մասնակցությունը պարտադիր է։ Բացակայությունների և բաց թողած ուսումնական աշխատանքի լրացման կարգը սահմանվում է դասընթացի մասնակցության պայմաններով։

Գնահատումը և ավարտական քննությունները

Մասնակիցների առաջընթացը գնահատվում է ամբողջ դասընթացի ընթացքում՝ տեսական և գործնական աշխատանքի, առաջադրանքների և միջմոդուլային մարզումների միջոցով։

Դասընթացի ավարտին անցկացվում են ավարտական քննություններ, որոնց շրջանակում գնահատվում են մասնակիցների տեսական գիտելիքները, խաղի կանոնների իմացությունը, մարզման պլանավորման և իրականացման կարողությունը, ինչպես նաև ձեռք բերած գիտելիքներն ու հմտությունները գործնական մարզչական միջավայրում կիրառելու ունակությունը։

Գնահատման ամբողջական պահանջները, չափորոշիչներն ու անցկացման կարգը մասնակիցներին ներկայացվում են դասընթացի մեկնարկին։

Մասնակիցների շրջանակը

Դասընթացը նախատեսված է 18 տարին լրացած անձանց համար, որոնք ցանկանում են սկսել կամ զարգացնել իրենց մարզչական գործունեությունը և պատրաստ են ձեռք բերել ու շարունակաբար կատարելագործել երեխաների և պատանիների հետ աշխատանքի համար անհրաժեշտ մասնագիտական գիտելիքներն ու հմտությունները։

Ընդունելության կարգը

Դիմորդը պետք է բավարար չափով տիրապետի դասընթացի պաշտոնական լեզվին՝ բանավոր և գրավոր։

Դասընթացի ընդունելությունն իրականացվում է ՀՖՖ-ի կողմից սահմանված ընթացակարգով։

Տեղերի սահմանափակ լինելու դեպքում դիմորդների ընտրությունը կարող է իրականացվել տեսական և գործնական քննությունների միջոցով։ Ընտրության պայմանները, քննությունների անցկացման կարգը և մյուս պահանջները ներկայացվում են տվյալ դասընթացի ընդունելության հայտարարության մեջ։

Պահանջվող փաստաթղթերը

Դիմելու համար անհրաժեշտ է լրացնել տվյալ դասընթացի ընդունելության հայտարարության մեջ հասանելի առցանց դիմում-հայտը և կցել պահանջվող փաստաթղթերն ու նյութերը։

→ Ներբեռնել ՈՒԵՖԱ/ՀՖՖ Ց կարգի դասընթացին դիմելու համար անհրաժեշտ փաստաթղթերի ցանկը (PDF)

Պահանջվող փաստաթղթերի և նյութերի վերջնական ցանկը ներկայացվում է տվյալ դասընթացի ընդունելության հայտարարության մեջ։

Մասնակցության վճարը

ՈՒԵՖԱ/ՀՖՖ Ց կարգի արտոնագրի դասընթացի մասնակցության վճարը կազմում է 150,000 ՀՀ դրամ՝ ներառյալ հարկերը և այլ պարտադիր վճարները։

Վճարումը կատարվում է երկու մասով։ Վճարման ժամկետներն ու պայմանները ներկայացվում են տվյալ դասընթացի ընդունելության հայտարարության մեջ։

Արտոնագիրը և հետագա կրթական ուղին

ՈՒԵՖԱ/ՀՖՖ Ց կարգի արտոնագիրը մարզչական կրթության հիմնական մեկնարկային որակավորումն է և հիմք է ստեղծում հետագա մասնագիտական զարգացման համար։

Դասընթացի պահանջները կատարած և գնահատումները հաջողությամբ անցած մասնակիցներին շնորհվում են Ց կարգի դիպլոմ և մարզչական արտոնագիր։

ՈՒԵՖԱ Ց կարգի վավեր արտոնագիր ունեցող մարզիչը կարող է շարունակել կրթությունը ՈՒԵՖԱ/ՀՖՖ Բ կարգի, ինչպես նաև մասնագիտացված ուղղությունների՝ ՈՒԵՖԱ Ֆուտզալի Բ, ՈՒԵՖԱ Դարպասապահների Բ և ՈՒԵՖԱ Ֆիթնեսի Բ դասընթացներում՝ բավարարելով յուրաքանչյուր դասընթացի համար սահմանված աշխատանքային փորձի և ընդունելության մյուս պահանջները։

Դիմելու կարգը

Դասընթացի ընդունելության հայտարարությունը հրապարակվում է ՀՖՖ պաշտոնական կայքում և սոցիալական հարթակներում։ Հայտարարության մեջ ներկայացվում են դիմումների ընդունման ժամկետները, ընդունելության պահանջները, ընտրության ընթացակարգը, վճարման պայմանները և կազմակերպչական մյուս մանրամասները։

→ Դիտել դասընթացների օրացույցը